ඉදිරියේදී කෘෂි පර්යේෂණ නිලධාරීන් බඳවා ගැනීමේදී කෘෂිකර්මය පිළිබඳව මනා දැනුමකින් පරිපූර්ණ පිරිස් බඳවා ගැනීමටත්, කෘෂිකර්ම විද්‍යාවල ඉගෙනුම ලැබූවන්ට එහිදී ප්‍රමුඛතාව ලබාදෙන බවත් කෘෂිකර්ම, පශු සම්පත් සංවර්ධන, වාරිමාර්ග සහ ධීවර හා ජලජ සම්පත් සංවර්ධන අමාත්‍ය පී. හැරිසන් මහතා කියයි.

රජයේ අපේක්ෂාව කෘෂිකර්මාන්තය හා බැදුණු යටිතල පහසුකම් සංවර්ධනය කොට තිරසාර කෘෂිකර්මාන්ත පිළිවෙතක් රටට හඳුන්වා දීම බව ද ඇමැතිවරයා පවසයි. ඇමැති පී. හැරිසන් මහතා යාන්ඔය ජලාශ ඉදිකිරීමේදී ඉඩම් පරිත්‍යාග කළ ගොවීන් හට 2018 මහ කන්නයේදී කන්න වන්දි පිරිනැමීමට එක්වෙමින් මේ බව පැවසීය.

යාන් ඔය මහකන්නය සඳහා ගොවීන් 113 දෙනකු සඳහා මෙහිදී වන්දි පිරිනැමීම සිදු වූ අතර මේ වන විට යාන්ඔය ඉඩම් පරිත්‍යාග කළ ජනතාවට හා ගොවීන්ට මිලියන 100ක පමණ වන්දි මුදල් පිරි නමා ඇත.

එහිදී වැඩිදුරටත් අදහස් දැක්වූ ඇමැතිවරයා අවධාරණය කළේ මේ වන විට මොරගහකන්ද සහ කළුගඟ ජලාශයේ ජලය අනුරාධපුර දිස්ත්‍රික්කයේ ජනතාව වෙත ලබාදීම සඳහා අවශ්‍ය ඇළවේලී ඉදිරියේදී කඩිනම්ව ඉදිකරන බවයි. එමඟින් පදවිය කෙලවරෙහි ජනතාව වෙත ලබා දීම තම අපේක්ෂාව බවත් පැවැසූ ඇමැතිවරයා පෙන්වා දුන්නේ යාන්ඔය ජලාශයට සමගාමීව වාහල්කඩ පදවිය වැව් මඟින් ගොවිතැන් කිරීමට නොහැකි වූ පදවිය සීමාවේ ඉඩම් වෙතද ජලය ලබාදීම සඳහා මේ වන විට වාරිමාර්ග දෙපාර්තමේන්තුව සමඟ ස්ථීර වැඩපිළිවෙළක් සඳහා සාකච්ඡා අරඹා ඇති බවයි.

රාජාංගනය සහ කනදරාව ජලාශයන්හි ජලය උපයෝගීකර ගනිමින් එම ප්‍රදේශවලම ජනතාව වෙත පිරිසිදු පානීය ජල ව්‍යාපෘති අරඹන බවත්, එමඟින් එම ප්‍රදේශවල ව්‍යාප්ත වී ඇති වකුගඩු රෝගයට පිළියමක් වනු ඇති බවත් ඇමැතිවරයා මෙහිදී කීය.

කෘෂි නවීකරණ ව්‍යාපෘතිය යටතේ ඉදිරියේදී පේමඩුව, රනෝරාව, තන්තිරිමලය ප්‍රදේශවල මුරුංගා වගා අරඹන බවත්, එමගින් වැඩි ඉල්ලුමක් ඇති මුරුංගා කොළ පිටරටට අපනයනය කර දේශීය ගොවියා ශක්තිමත් කිරීමට හැකියාවක් ලැබෙන බවත් ඇමැතිවරයා පැවැසු අතර ඉදිරියේදී කෘෂිකර්මාන්තය නඟා සිටුවීම සඳහා කෘෂි පර්යේෂණ නිලධාරීන් බඳවා ගැනීමේදී කෘෂිකර්මය පිළිබඳව මනා දැනුමකින් පරිපූර්ණ පිරිස් බඳවා ගැනීමටත්, කෘෂිකර්ම විද්‍යාවල ඉගෙනුම ලැබූවන්ට එහිදී ප්‍රමුඛතාව ලබාදෙන බවද කීය. එමඟින් කෘෂිකර්මාන්තය පිළිබඳව ගොවියා හා නිලධාරියා අතර සබඳතාව දියුණු වී කෘෂිකර්මාන්තය තුළ ඇති ගැටලු විසඳා ගැනීමට හැකියාව ඇති බව ද ඒ මහතා පෙන්වා දුන්නේය.

මෙම අවස්ථාවට යාන්ඔය ව්‍යාපෘති අධ්‍යක්ෂ හේමකුමාර, අනුරාධපුර දිස්ත්‍රික්ලේකම් ඩබ්.එම්. වන්නිනායක මහත්වරු ඇතුළු නිලධාරීහු මෙන්ම වන්දිලාභීහුද එක්ව සිටියහ.

උපුටා ගැනීම: දිනමිණ