பரீட்சைத் திணைக்களத்தை டிஜிட்டல் மயமாக்க புதிய கணினி நெட்வொர்க்: அமைச்சரவை அங்கீகாரம்!
இலங்கை பரீட்சைத் திணைக்களத்தின் அனைத்துக் கிளைகளையும் ஒன்றிணைக்கும் வகையில், புதிய மற்றும் விரிவான கணினி நெட்வொர்க் (Computer Network) அமைப்பொன்றை வடிவமைத்து, நிறுவி, நடைமுறைப்படுத்துவதற்கான அமைச்சரவை அங்கீகாரம் வழங்கப்பட்டுள்ளது.
அமைச்சரவை முடிவுகளின்படி, இந்தத் தீர்மானம் குறித்த விபரங்கள் பின்வருமாறு:
தற்போது பரீட்சைத் திணைக்களத்தின் பிரதான செயல்பாடுகள், ஒவ்வொரு பிரிவிற்கும் எனத் தனியான கணினி நெட்வொர்க்குகளாகவே இயங்கி வருகின்றன.
இதன் காரணமாக, பரீட்சை செயல்முறைகளின் பல கட்டங்கள் மனித வளங்களை மட்டுமே நம்பி, கைமுறையாக (Manual) செய்ய வேண்டிய நிலை உள்ளது.
தரவுகள் மற்றும் ஆவணங்கள் அனைத்தும் நேரடியாக (Physical) ஒரு இடத்திலிருந்து மற்றொரு இடத்திற்குப் பரிமாறப்படுகின்றன.
இவ்வாறான நடைமுறைகளால் பணிகளில் தாமதம் ஏற்படுவதுடன், திணைக்களத்தின் வினைத்திறன் குறைவதற்கும், பௌதீக மற்றும் மனித வளங்கள் வீணாவதற்கும் வழிவகுக்கிறது.
புதிய திட்டத்தின் நோக்கம்
தற்போதைய அரச துறையில் முன்னெடுக்கப்பட்டு வரும் டிஜிட்டல் மயமாக்கல் (Digitalization) செயல்முறைக்கு இணங்க இப்புதிய திட்டம் கொண்டுவரப்பட்டுள்ளது. இதன் மூலம் திணைக்களத்தின் அனைத்துக் கிளைகளும் ஒரே நெட்வொர்க்கின் கீழ் கொண்டுவரப்பட்டு, பரீட்சை திணைக்களத்தின் சேவைகள் மிகவும் விரைவாகவும், துல்லியமாகவும், நவீன தொழில்நுட்ப வசதிகளுடன் பொதுமக்களுக்கு வழங்கப்படும் என எதிர்பார்க்கப்படுகிறது.
Tags
செய்திகள்