முறையான நியமனம் வழங்கப்படாத அதிபர்களுக்கு வழங்கப்பட்ட கொடுப்பனவுகளை மீளப் பெற்றுக் கொள்ளுமாறு கல்வி அமைச்சு உத்தரவு

முறையான நியமனம் வழங்கப்படாத அதிபர்களுக்கு வழங்கப்பட்ட கொடுப்பனவுகளை மீளப் பெற்றுக் கொள்ளுமாறு கல்வி அமைச்சு உத்தரவு

முறையான நியமனங்கள் வழங்கப்படாத அதிகாரிகளுக்கு வழங்கப்பட்டுள்ள நிரந்தர அதிபர்களுக்குரிய விசேட கொடுப்பனவை அந்த அதிகாரிகளிடமிருந்து மீளப் பெற்றுக்கொள்ளுமாறு கல்வி மற்றும் உயர்கல்வி அமைச்சின் செயலாளர் நாலக களுவேவ, மாகாணக் கல்வி அதிகாரிகளுக்கு எழுத்து மூலம் அறிவித்துள்ளார்.

அதிபர் தரத்தைச் சேர்ந்தவர்கள் அல்லாத அதிகாரிகளுக்கும், நியமன அதிகாரியினால் முறையாக நியமனம் வழங்கப்படாத அதிகாரிகளுக்கும் இந்த விசேட கொடுப்பனவு வழங்கப்பட்டுள்ளதாகத் தகவல்கள் கிடைத்துள்ளதாகவும், இந்தக் கொடுப்பனவை அவ்வாறான அதிகாரிகளுக்கு வழங்க முடியாது என்றும் செயலாளர் தனது கடிதத்தில் குறிப்பிட்டுள்ளார்.

பாடசாலையின் நிரந்தர அதிபர் பதவிகளுக்கான கடமைகளைச் செய்யும் ஆசிரியர் சேவையைச் சேர்ந்த அதிகாரிகளுக்கும், அதிபர் சேவையின் நிரந்தரப் பதவிகளில் உள்வாங்கப்படாத—ஆனால் நிரந்தர அதிபராகக் கடமையாற்றும் மேலதிக பணியாளர் (Ad-hoc/Excess) நியமனம் பெற்ற அதிகாரிகளுக்கும், நியமன அதிகாரியினால் முறையாக நிரந்தர அதிபர் பதவிக்கு நியமிக்கப்படாத அல்லது கடமைகளை மேற்கொள்வதற்காக நியமனம் வழங்கப்படாத அதிபர் சேவையைச் சேர்ந்த அதிகாரிகளுக்கும் இந்த விசேட கொடுப்பனவு உரித்தாகாது என்றும் அக்கடிதத்தில் சுட்டிக்காட்டப்பட்டுள்ளது.

அவ்வாறான அதிகாரிகள் ஓய்வுபெறுவதற்கு முன்னர் இந்தக் கொடுப்பனவை மீளப் பெற்றுக்கொள்ள நடவடிக்கை எடுக்குமாறும் செயலாளர் மேலும் தெரிவித்துள்ளார்.

எனினும், இந்தக் கொடுப்பனவைத் தாம் கோரிப் பெறவில்லை என்றும், அரசு தமது பதவிக்கு அமைவாகவே வழங்கியது என்றும் சுட்டிக்காட்டும் பதில் அதிபர்கள், அந்தப் பணத்தை மீளப் பெறுவதைக் கைவிட்டுத் தமக்கு நிவாரணம் வழங்குமாறு கோரிக்கை விடுத்துள்ளனர்.